今日收到"李志強議員"一戶一信嘅宣傳單張，真係唔知好嬲定好笑，對於單張內容，有幾樣嘢想同各業主分享吓:
1. 李議員將工程進度嘅問題講到只係有業主拖延，但唔知李議員知唔知承建商因施工程序唔妥當，曾經俾政府部門要求停工呢？
2. 李議員認為部份業主對更換材料有意見係無理取鬧，但工程既然有寫用咩材料，如果要換係咪要問清楚呢？呢啲係消費者嘅權利，唔通李議員去消費嗰陣係逆來順受，商店話俾咩佢都會問都唔問就照單全收?
3. 李議員話維修小組無權無責，又無辦法有效監管工程，但據小弟記憶所及，李議員曾經同部份業主成立咗一個"關注組"，聲稱會為業主監管工程，唔知呢個"關注組"又有無權?有無責?有無做過嘢呢？另外，好遺憾都要講句，根據公契業委會都只係一個俾意見管理處嘅組織，並無實權，不過有會好過無，多個渠道同管理處溝通，並唔係李議員講到有業委會就可以解決問題咁………
4. 對於傳單中李議員話要由務實嘅人做業委，又擺張明單出嚟話佢嘅團隊務實，咁李議員係咪話其他參選嘅人唔務實?李議員有無實際嘅證據呢？還是李議員覺得只有佢自己/佢認同嘅人先係務實呢？傳單咁講會唔會令其他參選嘅業主心淡呢？
關於務實，我都有啲嘢想請教李議員，記憶所及，李議員同佢部分"務實"團隊成員都有加入維修小組，咁李議員同佢嘅團隊有無參與佢口中嘅吵鬧呢？一隻手掌拍唔响，單方面指責其他人係咪"務實"呢？而李議員話小組只剩餘十多名業主，係咪暗示李議員同佢嘅團隊已經無參與小組會議?遇事即退又係咪"務實"呢？
再退遠小小，喺承建商被發現俾政府除咗牌，好多嘢要處理嘅時候，當時嘅業委會主席---即係李議員，點解要辭職?將爛攤子推俾其他業主，咁又算唔算"務實"呢？而佢部分嘅"務實"成員，無記錯亦係上屆委員，又無記錯嘅話，都係有事就辭職，仲要係集體嗰隻，咁又係"務實"?除非喺李議員嘅概念中，"務實"係有事即閃，咁我無話可說…………，又或者李議員覺得一個組織唔可以有唔同意見，否則就係吵鬧/唔務實，咁我都無嘢好講
5. 現時嘅維修小組係咪務實我唔敢講，但佢哋既唔係工程界嘅專業人士，又只係義務去跟進工程嘅嘢，就算有人覺得佢哋做得唔係咁好，都唔應該咁無品單方面指責話佢哋呢樣嗰樣，唔知李議員認為係咪呢？
以上係一個既非市民選出嚟嘅議員，又唔能夠用公帑掛橫額、派傳單嘅小市民、小業主心聲。
梁志偉
沒有留言:
張貼留言